Réasúnaíocht do na Measúnuithe Rangbhunaithe (MRBanna) in NTI

Thar na trí bliana den tsraith shóisearach, beidh a lán deiseanna ag an scoláire chun sult a bhaint as
an sprioctheanga agus í a fhoghlaim ar fud na snáitheanna. Gabhfaidh sé do ghníomhaíochtaí agus
tascanna teanga chun

• cumarsáid a dhéanamh sa sprioctheanga chun críocha fiúntacha
• a fheasacht a dhoimhniú ar an gcaoi a n oibríonn an sprioctheanga
• léargas a fháil ar chultú(i)r na sprioctheanga.

Trí na gníomhaíochtaí sin forbróidh sé a chuid eolais, tuisceana agus scileanna i dteanga, i gcultúr agus i litearthacht, agus is amhlaidh a ghnóthóidh sé na torthaí foghlama trasna na snáitheanna.
Beidh dhá Mheasúnú Rangbhunaithe i Nuatheangacha Iasachta na Sraithe Sóisearaí sa dara agus sa tríú bliain d’oideachas na sraithe sóisearaí. Dhá mharcóir shoiléire atá sna Measúnuithe Rangbhunaithe i dturas foghlama an scoláire, agus iad ina gcuid lárnach freisin de mheasúnú leanúnach agus de ghnáthchleachtas seomra ranga. Sa dóigh seo, tá siad cosúil leis an measúnú foirmitheach a tharlaíonn gach lá sa rang. Mar sin féin, i gcás na Measúnuithe Rangbhunaithe, breactar síos breithiúnas an mhúinteora ar mhaithe le hathbhreithniú ar fhoghlaim agus ar mheasúnú ábhair, agus ar mhaithe le tuairisciú na scoile do thuismitheoirí agus don scoláire.
I rith na dtrí bliana den tsraith shóisearach, beidh a lán deiseanna ag an scoláire chun cumarsáid a dhéanamh sa sprioctheanga ag baint úsáid as na ceithre mhodh cumarsáide. Mar thoradh air sin, is le neamhspleáchas, le muinín agus le cruthaitheacht níos mó a dhéanann sé cumarsáid.
Tabharfaidh na Measúnuithe Rangbhunaithe na deiseanna seo a leanas don scoláire:

• cumarsáid a dhéanamh go muiníneach sa sprioctheanga
• a fheasacht a dhoimhniú ar an nasc idir teangacha agus cultúir
• taighde a dhéanamh ar eolas faoi thíortha na sprioctheanga agus faoi na cultúir bhainteacha
• comhoibriú le daoine eile ar thascanna cruthaitheacha
• a phearsantachtaí agus a spéiseanna uathúla a léiriú
• a chinntí féin a dhéanamh
• a dhul chun cinn agus a ghaiscí a shainaithint, a thuiscint agus a cheiliúradh.