Na Gnéithe Cáilíochta
Na Gnéithe Cáilíochta
Tacaíonn gnéithe cáilíochta le breithiúnas an scoláire agus an mhúinteora ar na Measúnuithe Rangbhunaithe agus is iad na critéir iad a úsáidfidh an múinteoir chun píosaí oibre an scoláire a mheasúnú. Cuirfear na gnéithe cáilíochta ar fáil sna treoirlínte measúnuithe le haghaidh Nuatheangacha Iasachta na sraithe sóisearaí. Cuirfidh gach scoláire an dá Mheasúnú Rangbhunaithe (MRB) i gcrích.
| MEASÚNÚ RANGBHUNAITHE | An measúnú a chur i gcrích | Cruinniú ar Fhoghlaim agus ar Mheasúnú Ábhair (AFMÁ) |
|---|---|---|
| Samplaí ó mo Phunann Teanga Scoláire | Sa dara bliain | Cruinniú athbhreithnithe amháin |
| Tasc Cumarsáide ó Bhéal | Sa tríú bliain | Cruinniú athbhreithnithe amháin |
Na Measúnuithe Rangbhunaithe a Mheasúnú
Beidh sonraí níos mine ar fáil i dtreoirlínte measúnaithe ar leith maidir leis an measúnú ar an tuairisciú i Nuatheangacha Iasachta na Sraithe Sóisearaí, ina leagtar amach treoracha ar na socruithe praiticiúla a bhaineann le measúnú na Measúnuithe Rangbhunaithe. Áireofar orthu sin, mar shampla, an treoir maidir leis na míreanna le haghaidh an Mheasúnaithe Rangbhunaithe Samplaí ó mo Phunann Teanga Scoláire, agus fad agus formáidí a mholfar le haghaidh Mheasúnú Rangbhunaithe an Taisc Cumarsáide ó Bhéal. Cuirfear gnéithe cáilíochta ar fáil freisin le haghaidh an dá Mheasúnú Rangbhunaithe agus tacaíocht i dtaca le breithiúnas ‘ar an iomlán’ a úsáid i ndáil leis na gnéithe cáilíochta. Beidh ábhar cuimsitheach acmhainne i bhFoireann Uirlisí don Mheasúnú CNCM freisin le húsáid agus le tagairt dó i measúnú leanúnach ranga ar Nuatheangacha Iasachta na sraithe sóisearaí, agus lena chois sin tabharfar mionchuntas ar an bpróiseas a bhaineann leis an Athbhreithniú ar Fhoghlaim agus ar Mheasúnú Ábhair.