Léargas ar an tsonraíocht Struchtúr Cuirtear an tsonraíocht i láthair in dhá shnáithe. I snáithe 1, foghlaimíonn an scoláire faoi na peirspictíochtaí teoiriciúla difriúla a mbíonn tionchar acu ar thaispeántas barr feabhais agus conas an tuiscint sin a chur i bhfeidhm ar raon gníomhaíochtaí difriúla. I snáithe 2, foghlaimíonn an scoláire faoi cheisteanna comhaimseartha sa ghníomhaíocht choirp agus taithí a bhíonn ag daoine difriúla ar ghníomhaíocht choirp agus ar spórt. Snáithe 1 I dtreo taispeántas barrmhaith Snáithe 2 Ceisteanna comhaimseartha sa ghníomhaíocht choirp Topaicí 1. Scil agus teicníc a fhoghlaim agus a fheabhsú 2. Éilimh fhisiceacha agus shíceolaíocha an taispeántais 3. Struchtúir, straitéisí, róil agus gnásanna 4. Ag pleanáil i gcomhair taispeántas barrmhaith Topaicí 5. Gníomhaíocht choirp a chur chun cinn 6. Eitic agus cothrom na féinne Ina theannta sin, ainmneofar dhá cheann de na topaicí seo a leanas gach bliain: 7. Gníomhaíocht choirp agus ionchuimsiú 8. Teicneolaíocht, na meáin agus spórt 9. Inscne agus gníomhaíocht choirp 10. Gnó agus fiontraíocht i ngníomhaíocht choirp agus spórt Tá rannpháirtíocht ghníomhach foghlaimeoirí ar bhonn fisiceach lárnach do theagasc agus d’fhoghlaim i gCorpoideachas na hArdteistiméireachta. Ionas go mbeidh sé sin in ann tarlú, foghlaimíonn an scoláire faoi na peirspictíochtaí teoiriciúla difriúla trína rannpháirtíocht i dtrí ghníomhaíocht choirp difriúla. Roghnaítear na gníomhaíochtaí sin ó sé réimse gníomhaíochta coirp ar leith a léiríonn na gníomhaíochtaí is coitianta a áirítear i gcláir corpoideachais scoileanna i láthair na huaire. Léirítear sa ghrafaic thíos na sé réimse gníomhaíochta coirp óna gcaithfear na trí ghníomhaíocht a roghnú – gníomhaíocht amháin as trí réimse dhifriúla. Figure 1: Réimsí Gníomhaíochta Coirp Sampla: Áirítear ar na trí ghníomhaíocht choirp roghnaithe 1. tarrtháil (Uiscíocht) 2. cispheil (Cluichí) 3. treodóireacht (Gníomhaíochtaí eachtraíochta). Bíonn na trí ghníomhaíocht choirp seo mar fhócas ag teagasc agus foghlaim i gCorpoideachas na hArdteistiméireachta. De réir mar a bhíonn an scoláire ag foghlaim faoin iliomad tosca a mbíonn tionchar acu ar rannpháirtíocht agus ar thaispeántas, iarrtar orthu a gcuid foghlama a chur i bhfeidhm ar bhealach córasach chun a dtaispeántas féin a fheabhsú sna trí ghníomhaíocht choirp roghnaithe. Tá an próiseas pleanála sin i gcroílár na dtascanna measúnaithe i gCorpoideachas na hArdteistiméireachta. Roghnaíonn an foghlaimeoir ceann de thrí ghníomhaíocht choirp roghnaithe a bhfuil a rang i mbun staidéir orthu dá mheasúnú feidhmíochta. Leithdháileadh ama Tá Corpoideachas na hArdteistiméireachta ceaptha lena theagasc laistigh de 180 uair an chloig. Moltar as na cúig thréimhse ranga sa tseachtain a mholtar, gur cheart tréimhse dhúbailte in aghaidh na seachtaine a áireamh chun rannpháirtíocht ghníomhach an fhoghlaimeora a éascú sna trí ghníomhaíocht choirp. D’fhéadfadh foghlaim a bhaineann leis an tsonraíocht tarlú i socruithe praiticiúla lasmuigh den scoil. Tá sé tábhachtach, dá bhrí sin, go léirítear é sin sna socruithe clár ama.
